你要"大", 定"深"呀?

好恐怖!
我屋企有一束好大好大既巨型百合花!
佢地而家開到好燦爛,而每一朵都有我塊面咁大!
大到我覺得有D邪! 好似有花精住係入面咁!

而且果束花, 加埋成打咁多,
果陣花香... 香到爆,
早兩日我一起身,
一行近, 直頭係香到攻鼻!

雖然我覺得怪,
之但係我屋企人覺得勁!
我記得早幾日我阿媽一返屋企,
就好開心咁話... 嘩! 仔! 你真係未見過咁大朵! 勁呀!

其實唔只花,
原來我地好多人都一直追求 "大" 呢回事。
身裁要大,
陣容要大,
把聲要大,
數目要大,
總之越大, 就越滿足。

與其追求大, 不如反其道而行,
追求細。

體積上既細可以係一種追求。
睇報紙你一定睇過全球最大煲既飯,
最大個月餅之類既新聞。
之但係, 大既野, 其實你人多就一定做到架WOR。

整個最大既月餅, 一兩日。
但係如果你要做一個最細既月餅,
我估個功夫一定多好多。
單係餅面上面既精準刻字,
就已經花好多功夫。

所以, 體積細, 亦都會包括細節既追求。
就以身材做例,
有人千方而計要整大個胸,
但係對於成個人既比例既追求又視而不見。

你都有聽過黃金比例,
係 1: 1.618
係去到小數位後3個數字既仔細追求。
呢個就係對於質素既追求。

就好似做GYM,
有人追求大。
好似膊頭咁,
其實有分前中後三個部份。
一般人覺得大, 就淨係睇到前膊同中膊最大舊既肌肉。
但係後膊果一舊小肌肉,
就會唔記得左。
但原來呢舊小肌肉好緊要,
因為佢會令你成個膊頭個位置同比例都好睇D,
唔練佢, 你個膊可能會好大, 但係就會有圓肩既問題。

好多人以為"大"先會有官能刺激,
但其實深度一樣有刺激俾到你。

而果份刺激係來自發現。

大, 你唔駛思考,
你一睇就知, 好大呀, 嘩!
呢個嘩係一閃即逝既。

但係深度, 你要花時間去感受,
你要俾時間去觀察。
然後當你留意到一件事既唔同層次,
唔同階段既逐漸變化,
你都會有官能刺激。

哦, 原來甜之中, 仲有少少甘, 有少少薑既辣;
哦, 原來黃昏日落每一秒既顏色都有唔同既濃;
哦, 原來呢個DRUM LOOP之下, 有一後好輕巧既GUITAR;
呢個, 都係官能刺激。

就好似性一樣,
有人覺得興奮就係要大叫出黎,
大聲D, 再大聲D, 俾反應, COME ON!

之但係, 你又有無花時間留意對方, 探索對方, 觀察對方?
佢面部微絲血管擴張之後既緋紅,
佢頸上動脈既跳動,
佢慢慢加快既呼吸,
佢按捺不住既喘息...

時間已經少, 所以更加要好好用時間, 我地講既係 QUALITY TIME。
俾時間去發掘,
然後, 享受更深層既官能刺激。

(舊文重PO) FILL IN THE BLANK

之前有一個星期日,
我行過中環,
唔知係唔係我好耐都無試過假日去中環,
我發現有大量後生仔, 係大量!
不論男女,
一人拎住一部相機,
四圍影。

而佢地主要出沒既地點都係中環既舊樓一帶,
荷理活道既樹, 唐樓, 廟, 大排檔, 街市,
石板街既舊郵箱, 電箱, 石梯, 鐵皮檔,
去到都爹利街後而果條舊樓梯,
都有好多人。
拎住數碼相機又有, LOMO機又有, 單鏡反光機又有,
總之就影影影。

點解影相既, 都係後生既多呢?
佢地有好多都係香港人黎架WOR,
而點解佢地又會圍住呢D非旅遊景點既舊野影呢?
影相係一個捕捉既過程, 係一個留低既過程。
咁呢班後生仔影相既過程,
又想留低乜野呢?

或者舊既野對於上一代同新一代既人既意義係完全唔同。
對於上一代, 係佢地辛苦建設既遺物,
佢地捱一世人, 就係要脫離呢D舊野,
佢地要進步,
要新, 唔要落後。

之但係, 對於新一代既人,
呢D舊野, 可能係新既事物。
由呢D舊野, 佢地發現到既係上一代人既生活智慧,
發現到呢D舊野附帶既人情,
由呢D舊野發現到香港人既精神。

上一代人睇到呢D舊野,
佢地睇到既係一件件物件。

但係新一代人佢地睇到既,
唔只係物件, 而係佢地背後既價值, 果份象徵意義。
而後生既一代, 就因為HUNGER FOR一份香港既身份, 香港既意義,
而被呢D舊野吸引到。

始終, 歷史係身份認同既重要一環。
但係同一條疤痕, 有人會諗起受傷時既痛楚,
有人會諗起劫後餘生既幸運, 又或者生命力既強大。
呢個唔同既睇野角度,
無岩同錯既分別,
只係純粹唔同。

行過中環間GOD,
呢間店就係出名在將一D 以前既香港文化包裝成商品。
鋪入面都係後生一代既人多。
我地唔只想用相機留低呢D歷史,
我地甚至唔介意用錢去買一D包裝出黎既歷史, 商品化既歷史。

或者都睇到兩代人唔同既生活品味。
上一代, 高科技, 快, 電腦化太空化就係生活品味。
但係今日新一代既生活品味,
就係唔會一味向前,
仲要識得欣賞歷史留低俾我地既痕跡。

我諗我開始明白最近好多所謂80後同80前既矛盾,
或者矛盾既位於, 唔只關係到利益,
而係關係到香港價值觀既矛盾。
香港係乜野呢?
香港人係乜野呢?

係咪只等於發展, 只等於經濟呢?
而香港係唔係經歷過一段歷史中空既時段呢?
彷彿我地要搵返條根,
就要跳到去60, 70年代,
而係80年代, 90年代,
就好似一片空白咁既呢。

呢班人影影影,
係唔係就係FILLING IN THE BLANK呢?

You are my everything?

前排側田有首歌
叫"無限大"
有一句歌詞就係 YOU ARE MY EVERYTHING。

就咁聽好似好正常,
無問題,
又或者有人覺得好深情好浪漫。

之但係,
如果你有一個情人當你係佢既所有既話,
咁就好得人驚。

當你成為佢既所有, 就即係佢無晒自己。
佢只係會為左你而生存,
為左你而付出。
佢會估你想點, 而去滿足你。

但最得人驚既係,
佢心入面既你, 未必真係你。
而係THE IDEA OF YOU。

而漸漸,
佢會要求你對佢都一樣。
"我為你付出左咁多,
點解你唔明我既呢?"

"我做左咁多野, 你唔開心咩?
你唔鍾意, 我改丫, 我為左你而改丫。"

於是,
你自己會開始有壓力。
"我都無叫你咁咁咁,
你唔駛特登為我咁咁咁WOR。"

佢會話,
"咁我都係鍾意你先咁咁咁JEH,
我都係鍾意你先企係你既角度諗JEH,
唔通我為你諗都係錯喇WOR。"

大戰就一觸即發。
鬧多幾次,
佢開始靜落黎,
佢為左你, 佢改,
佢忍,
佢受晒,
因為你已經係佢所有,
佢斷晒自己後路。
佢唔想再出聲,
因為佢怕你會走,
你係佢所有,
你一走,
佢唔知可以點,
佢亦都未必諗過無左你,
因為你就好似自自然然存在係佢既世界入面,
正如我好地地, 唔會諗如果有一日個太陽唔見左會點一樣。

吵吵鬧鬧幾次
忍受夠佢既沉默之後。
終會分開。

點算呀。
佢連自己都無埋,
佢成個世界淪陷架喇。

其實呢條數係關乎個百分比。

到有一日你生活越多姿多釆,
你自己有既野越多,
你就會發覺,
原來一段關係佔你心入面係越少。

如果佢係你百分之一百,
咁你既所有情緒都係圍住佢而轉。
你既思路你既原則你既邏輯都係依從對方既模式運行。
但係如果你屋企佔返20%
你份工佔返10%,
你既朋友佔25%,
你既興趣又佔10%,
咁呢段關係就會佔你餘下既35%,
都有一定既份量,
但係你既思路你既原則你既邏輯會平衡一D,
你既軸心唔會偏晒去對方果一面。

好娘既一句就係,
我鍾意你, 係因為你係你,
如果連你都無左你自己,
我仲點去愛你?

好娘, 但係真既。

唔好將對方放到無限大。
唔好將自己既一己心願放到無限大,
將自己既慾望放到無限大。

OK GO 新 MV

呢隊樂隊叫 OK GO, 佢地既 MV 好多都好好睇。
如果你記得, 佢地兩年前有一首歌既 MV,
係四個成員係四部跑步機上面用不同花式跑左成首歌。



真係好好睇, 好睇到有時嬴左首歌本身。

Anyway, 佢地又一力作!
今次 OK GO 同 Syyn Labs 合作,
雖然條橋好多人用過,
但都不得不佩服佢地用左幾個月時間準備而得來既精確預算。

關於的神

好多人以為我真心憎的神。
有趣。

不過你錯喇。

港台入面, 我朋友唔算多,
一個係 Fion, 即係以前 TP新勢力既拍檔,
以及做過 Made in HK 同輕談既 Fion,
佢係一個好明白我既女人,
我地亦都乜都夠膽死拎出黎講。

另一個, 叫 May, 係一個幕後同事, 人非常好。
亦都只有佢曾經同我去過旅行。

食品味

食家講既係品味。
品味有講 "品", 同埋"味"。

先講 "品",
食野一定要食得有品。
唔幫襯剝削員工既食品企業, 係有品。
唔食瀕危物種, 都係有品。

我只要見到一D自稱為食家既人介紹魚翅,
我就唔會認同佢食家既身份。
你以為只係食人地一兩條魚鰭,
實情係條鯊魚俾人切左條鰭之後,
就要慢慢被折磨至死,
太殘忍。

咁樣食法, 太無品。

騷動音樂 Playlist (27/2/2010) ft. 張學友專訪

今集一個人訪問張學友! 緊張到不能!

張學友話今次呢張 "Private Corner" 係一張希望你聽落無包袱既專輯。
的確, 由第一首歌聽到第十首歌,
有一種就連時間都可以超越既無重感。

曾經睇過一個訪問,
張學友話自己感激音樂。
今次呢張 Private Corner 令學友感激既地方就係佢學到新既野, 接觸到新既野,
佢話呢張碟可能要早d做, 不過, 到今日先做都仍然無憾。
原來張學友今日呢個地位,
都仍然有突破, 都仍然有感激。